ತಪ್ತ ವಿರಹಿಣೀ .....

                                                           

 

 

 

ಕೆನ್ನೆಯ ಮೆಲಿದ್ದ ಕೂದಲು ಸರಿಸಿ

ತಲೆ ನೇವರಿಸಿ

ಮುತ್ತಿನ ಶುಭೋದಯ ತರುತ್ತಿದ್ದ

ಆತನೆಲ್ಲಿ ......?

ಕೃಷ್ಣನಿಗೋ  ಮುಗಿಯದ ರಾಜಕಾರಣ;

ಮುತ್ತಿಗೊಂದು ತುತ್ತಿಡುತ್ತ

ತುತ್ತಿಗೊಂದು ಮುತ್ತಿಡುತ್ತ

ಬರಿದಾಗಿಸುತ್ತಿದ್ದ ತಟ್ಟೆಗೂ ನೆನಪಿದೆ

ಆತನೆಲ್ಲಿ ........?

ಕೃಷ್ಣನಿಗೋ ಸದಾ ಗೋಪಿಕೆಯರ ಜೊತೆ;

ಆಸೆಗಳ ಭಾರಕ್ಕೆ ಮುಚ್ಚಿದ  ರೆಪ್ಪೆಗಳಿಗೆ

ಬಾಗಿ ಚುಂಬಿಸಿ

ಲೋಕವನ್ನೇ ಮರೆಸುತ್ತಿದ್ದ

ಆತನೆಲ್ಲಿ .........?

ಕೃಷ್ಣನಿಗೋ  ಯುದ್ದ ಸಂಬ್ರಮ;

ಪ್ರಳಯವೇ ಸಂಭವಿಸಿದರೂ

  ಸುರಕ್ಷಿತವೆನಿಸುವಂತೆ

ಬಿಗ್ಗಿಬಿಗಿ ಬಾಹುಗಳಲ್ಲಿ  ಬಂಧಿಸುತ್ತಿದ್ದ

ಆತನೆಲ್ಲಿ ........?

ಕೃಷ್ಣನಿಗೋ ಅಪಹರಣಕಾಯದಲ್ಲಿ ತನ್ಮಯ;

ಸ್ವಲ್ಪವೂ ಸುಕ್ಕಾಗದ ಚಾದರ

ನೀರಸ ಬೇಸರದ  

ಕಾಯುವಿಕೆಯ ಕತೆ ಹೇಳುವಾಗ

ಆತನೆಲ್ಲಿ ......?

ಕೃಷ್ಣನಿಗೋ  16 ಸಾವಿರ ಹೆಂಡತಿಯರು ;

ರಾಧೆಗೋ  ಕೃಷ್ಣನೇ  ಆಕೆಯ ಪ್ರಪಂಚ

ಕೃಷ್ಣನಿಗೆ ಆಕೆಯು ಪ್ರಪಂಚದ ಒಂದು ಭಾಗ;

ರಾಧೆಯಂತಿರುವ  ಹೆಣ್ಣುಗಳು 

 ಮೆಚ್ಚೋ... ಹುಚ್ಚೋ ...

ಗೊತ್ತಿಲ್ಲ  ನಮಗೆ

ಗೊತ್ತಿರುವ ಕೃಷ್ಣ  ನಗುತ್ತಿದ್ದಾನೆ ಕಣ್ಣಲ್ಲೇ .